Archive for ජූලි, 2009|Monthly archive page

ඔ‍බේ ජීමේල් ගිණුම රැකගන්න

පසු ගිය දිනෙක ට්විටර්හි වටිනා තොරතුරු රැසක් අපහාරකයකු (Hacker) විසින් සොරා ගෙන තිබෙනවා. ඒ ට්විටර් සේවකයකුගේ ජීමේල් ගිණුම තමා සතු කර ගනිමින්, ඒ හරහා ට්විටර් සේවාවට අයත් ගූගුල් ලිපි වැනි නොයෙකුත් සේවාවන්හි ගබඩා කර තිබූ තොරතුරු හා සම්බන්ධ වෙමින්. මෙම අපහාරණය (Hacking) සිදු කොට ඇත්තේ එම සේවකායාගේ ජීමේල් ගිණුමේ මුරපදය නැවත ලබා ගැනීමේ (Password recovery) සේවාව භාවිතා කරමින්. මෙම ජීමේල් ගිණුමේ නැවත ලබා ගත් මුරපදය ලැබෙන්නට සලස්වා ඇත්තේ නිෂ්ක්‍රීය (Deactivated) වූ හොට්මේල් ගිණුමකටයි. මෙම හොට්මේල් ගිණුමේ තොරතුරු සොයාගත් මෙම අපහාරකයා එය නැවත සක්‍රිය කර ජීමේල් ගිණුමේ සම්පූර්ණ පාලනය තමා සතු කර ගෙන තිබෙනවා.

Gmail-security

අපහාරණය සියයට සියයක් නැවැත්විය නොහැකි වුවත් අප වඩාත් ආරක්ෂාකාරී විය යුතු වනවා. පහත දැක්වෙන්නේ ජීමේල් ගිණුමේ ආරක්ෂාව සම්බන්ධයෙන් මා දැනගත් අප හිතට ගතයුතු වැදගත් කරුණු කිහිපයක්.

ශක්තිමත් මුරපදයක් භාවිතා කිරීම (Strong Password)
මෙය නැවතත් මතක් කිරීම සුදුසුයයි සිතුණා, ජීමේල් මුරපදය පමණක් නොව අන් කවර මුරපදයකට වුව මෙය වලංගුයි. ශක්තිමත් මුරපදයකට පදනම වන්නේ එදිනෙදා සාමාන්‍යයන් නිතර භාවිතා වන වචන යොදා නොගැනීමයි. අවම වශයෙන් අනුලකුණු (characters) 10ක් වත් තිබිය යුතු බවයි මගේ හැඟීම. ත‍වද මුරපදයකට අකුරු, සංඛ්‍යාත ස‍හ සංකේත (letters, numbers and symbols) යන තුන්වර්ගයේම අනුලකුණු ඇතුලත් කිරීම වඩා සුදුසුයි (උදා: jan587my100%).

ජීමේල් ගිණුමේ දෙවන විද්‍යුත් තැපෑල ලිපිනය (Alternate e-mail address) සක්‍රිය සහ ආරක්ෂාකාරී එකක් වීම
ඔබේ ජීමේල් ගිණුමේ දෙවන විද්‍යුත් තැපෑල ලිපිනය සඳහා ලබා දී ඇත ලිපිනය ඉතා වැදගත්, නැවත ලබා ගත් මුරපදය ඔබ විද්‍යුත් තැපෑල හරහා ලබා ගතහොත් එය ලැබෙන්නේ මෙම ලිපිනයටයි. ඒ නිසා ඒ සඳහා ආරක්ෂාකාරී මෙන්ම භාවිතයේ ඇති ලිපිනයක් ලබා දිය යුතු අතර එම ලිපිනය සහිත ගිණුම නිතර පරිහරණය කිරීමටද ඔබ වග බලා ගත යුතුයි.

එස්. එම්. එස්. මගින් මුරපදය නැවත ලබාගැනීම සක්‍රිය කිරීම
මෙම ක්‍රමය ජීමේල් සඳහා මෑතකදී හඳුන්වා දුන්නක්. නමුත් මෙය වඩාත් ආරක්ෂාකාරී ක්‍රමයක් ලෙස සැලකෙනවා. ඒ ඔබේ ජංගම දුරකථනයටම මුරපදය ගෙන්වා ගැනීමට හැකිවීමත් එය අනෙකෙකු භාවිතා කිරීමේ අවස්ථා අඩු වීමත් නිසාය.

ආරක්ෂක ප්‍රශ්ණය (Security Question) හරහා මුරපදය නැවත ලබාගැනීම
එතරම්ම ආරක්ෂාකාරී නොවූවත් නිවැරදි ව භාවිතා කිරීමෙන් යම් ප්‍රතිඵල ලබා ගත හැකි ක්‍රමයක්. මෙහිදී ජීමේල් මගින් ලබා දෙන සාමාන්‍ය ආරක්ෂක ප්‍රශ්ණ වෙනුවට තමාගේම ආරක්ෂක ප්‍රශ්ණයක් සහ පිළිතුරක් ලබා දීමෙන් ද ඔබේ ජීමේල් ගිණුමේ ආරක්ෂාව දියුණු කළ හැක.

Gmail-password

මෙම වෙනස්නම් සිදු කිරීමට ජීමේල්හි Settings පිටුවේ ඇති Accounts & imports ටැබයේ Google Account settings සබැඳුමේ ක්ලික් කරන්න. ඉන් පසු Google Account settings පිටුවේ ඇති Change Password recovery options සබැඳුමේ ක්ලික් කරන්න. ඔබේ ජීමේල් ගිණුම ආරක්ෂා කර ගැනීමට මෙම කරුණු උපකාර වේයයි මා සිතනවා.

ඔබට හැකිනම් මෙම ලිපිය ඔබේ මතය අනුව වර්ගීකරණය කිරීමෙන් (Rating) මෙම බ්ලොග් අඩවියේ දියුණුවට සහය වන්න. ඔබේ ප්‍රතිචාර සඳහා සැම විටම විවෘතයි.

ආර්.එස්.එස්. ඔස්සේ සම්බන්ධ වීමට මෙතන ක්ලික් කරන්න

මයික්‍රොසොෆ්ට් වින්ඩෝස් 7 වැඩ කටයුතු නිමා කෙරේ

බොහෝ දෙනා වින්ඩෝස් 7 ගැන දැඩි උන්නදුවකින් ඉන්නේ. වින්ඩෝස් 7 වැඩ කටයුතු නිම කළ බව මයික්‍රොසොෆ්ට් සමාගම ඊයේ (බදාදා) නිල වශයෙන් ප්‍රකාශ කළා.

Windows-7.Finalized

මේ අනුව කලින් සැළසුම් කළ පරිදි ඔක්තෝම්බර් 22වන දා වින්ඩෝස් 7 නිකුත් කිරීමට මයික්‍රොසොෆ්ට් සමාගමට අවස්ථාව ලැබෙනවා. ඇත්ත වශයෙන්ම වින්ඩෝස් 7හි වැඩ සම්පූර්ණ කර ඇත්තේ ජූලි 13වන දා, නමුත් වැඩිපුර දින 10ක් යොදා ගෙන එය තව දුරටත් පරීක්ෂාවට ලක් කළ බවයි මයික්‍රොසොෆ්ට් සමාගම පවසන්නේ.

පහත දැක්වෙන්නේ මේ සම්බන්ධයෙන් මයික්‍රොසොෆ්ට් සමාගම නිකුත් කළ වීඩියෝවක්.

ඔබට හැකිනම් මෙම ලිපිය ඔබේ මතය අනුව වර්ගීකරණය කිරීමෙන් (Rating) මෙම බ්ලොග් අඩවියේ දියුණුවට සහය වන්න. ඔබේ ප්‍රතිචාර සඳහා සැම විටම විවෘතයි.

ආර්.එස්.එස්. ඔස්සේ සම්බන්ධ වීමට මෙතන ක්ලික් කරන්න

සැප්තැම්බර් 30ස් වෙනිදාට ගූගුල් වේව් ගිණුම් 100,000 විවෘත කෙරේ

ඔන්න පසුගිය සතියේ අපේ බුධාජීවගේ ලියමනේ සඳහන් වූ පරිදි මමත් ගූගුල් වේව් සඳහා අයැදුම් කරා. ඇත්තටම ඒ ගැන වැඩිපුර සොයා බැලුවේ එම ලිපියෙන් පසුවයි. ගූගුල් වේව් නිසා ඉදිරියේදී විද්‍යුත් සන්නිවේදනය බොහෝ දුරට වෙනස් වීමට ඉඩ තිබෙනවා.

Google-Wave-Screenshot
විශාල කිරීමට ඡායාරූපයේ ක්ලික් කරන්න

දැනට සංවර්ධකයින්(Developers) 6,000 කට පමණක් සීමා කර ඇති ගූගුල් වේව් සැප්තැම්බර් 30වෙනිදා පොදු ගිණුම් 100,000ක් ලබා දෙන බව ගූගුල් වේව් සංවර්ධක බ්ලොග් අඩවියේ සඳහන් වෙනවා. මේ ගිණුම් 100,000ය තෝරා ගන්නේ ගූගුල් වේව් අයැදුම් කල අයගෙන් පමණයි. ගිණුම් 100,000ක් කියන්නෙ ඉතාම සීමිත සංඛ්‍යාවක් කියලයි මට හිතෙන්නෙ.

තවද යෙදුම් ක්‍රමලේඛන අතරුමුහුණත(application programming interface (API)) හරහා ගූගුල් වේව් සන්නිවේදන වර්ඩ්ප්‍රෙස් සමග අන්තර්ගත කීරීමේ වැඩසටහනක් ද නිර්මාණය කර ඇති බව බ්ලොග් අඩවියේ සඳහන් වෙනවා.

සැප්තැම්බර් 30ස් වෙනිදාට බලමු අපටත් ගූගුල් වේව් උණු උණුවේම ලබාගන්න හැකිවෙයි ද කියා.

මෙම සතියේ මත විමසුම ගූගුල් වේව් ගැනයි, ඊට සහභාගී වී සහය දක්වන මෙන් කරුණාවෙන් ඉල්ලා සිටිනවා. ඔබට හැකිනම් මෙම ලිපිය ඔබේ මතය අනුව වර්ගීකරණය කිරීමෙන් (Rating) මෙම බ්ලොග් අඩවියේ දියුණුවට සහය වන්න. ඔබේ ප්‍රතිචාර සඳහා සැම විටම විවෘතයි.

ආර්.එස්.එස්. ඔස්සේ සම්බන්ධ වීමට මෙතන ක්ලික් කරන්න

බිල් ගේට්ස්ගේ ශ්‍රී ලංකා වීඩියෝ පණිවුඩය

මගේ කලින් ලිපියේ බිල් ගේට්ස් ශ්‍රී ලංකාවට වීඩියෝ පණිවුඩයක් එවූ බව සඳනන් වුනා. මෙම වසර ශ්‍රී ලංකාවේ තොරතුරු තාක්ශණය සහ ඉංග්‍රීසි භාෂා‍ව වෙනුවෙන් නම් කිරීම සම්බන්ධවයි මෙම වීඩියෝ පණිවුඩය ලැබුණේ. ඒ වීඩියෝ පණිවුඩයේ යූටියුබ් වීඩියෝවක් මගේ මිතුරෙකු මාර්ගයෙන් මට ලැබුණා. ඔන්න නැරඹුවේ නැති කෙනෙක් ඉන්නවනම් දැන් නරඹන්න පුළුවන්.


ආර්.එස්.එස්. ඔස්සේ සම්බන්ධ වීමට මෙතන ක්ලික් කරන්න

බිල් ගේට්ස් භෞතික විද්‍යා දේශන බෙදා හරියි

බිල් ගේට්ස් නාමය පසු ගිය දින කීපයේ ශ්‍රී ලංකාවේ පුවත් අතර නිතර සඳහන් වුනා. ඒ මයික්‍රොසොෆ්ට් විස්ටා සහ මයික්‍රොසොෆ්ට් ඔ‍ෆිස් සිංහලෙන් නිකුත් වීම නිසා. තවද ඔහු ශ්‍රී ලංකාකියන්ට වීඩියෝ පණිවුඩයක්ද එවූ බව ද වාර්තා වනවා. මේ වන විට මයික්‍රොසොෆ්ට් සමාගමේ පූර්ණ කාලීන සේවයෙන් ඉවත් වී සිටින ගේට්ස් වැඩි අවධානයක් යොමු කොට ඇත්තේ තම පදනමේ කටයුතු වලට බවයි පැවසෙන්නේ. මෙම වැඩ කටයුතු අතරම ලොව සුප්‍රසිද්ධ භෞතික විද්‍යා දේශන මාලාවක් අන්තර්ජාල‍ය ඔස්සේ නිකුත් කිරීමට ඔහු කටයුතු කර තිබෙනවා. 1964දී ලොව පතල විද්‍යාඥයකු සහ නොබෙල් සම්මාන ලාභියෙකු වන රිචර්ඩ් ෆයින්මන් (Richard P. Feynman (1918-1988)) විසින් පවත්වන ලද මෙම දේශන මාලාව මයික්‍රොසොෆ්ට් පර්යේෂණ (Microsoft Research) වෙබ් අඩවිස ඔස්සේ නොමිලේම නැරඹිය හැක. මෙම ව්‍යාපෘතිය නම් කොට ඇත්තේ ටූවා නමිනි (Project Tuva).

Project-Tuva

ෆයින්මන්ගේ උගැන්වුම් රටාව ජනතාව වැඩි වශයෙන් විද්‍යාව කෙරෙහි නැඹුරුවීමට පෙළඹන්නක් බවත් මීට ව‍සර 20කට පෙර තමා මුල් වරට නැරඹූ එම දේශන මාලාව ලොවට ඉදිරිපත් කිරීම තමාගේ සිහිනයක් වූ බවත් ගේට්ස් පවසනවා.

ගුරුත්වාකර්ශණය වැනි භෞතික විද්‍යා සිද්ධාන්ත වලින් අන්තර්ගත මෙම දේශන මාලාව නැරඹීමටනම් ඔබ මයික්‍රොසොෆ්ට් සිල්වර්ලයිට් (Microsoft Silverlight) මෘදුකාංගය ඔබේ පරිඝණකයේ ස්ථාපනය කළ යුතු වෙනවා.

මෙම දේශන මාලාව නැරඹීමට මෙතන ක්ලික් කරන්න.

මයික්‍රොසොෆ්ට් සිල්වර්ලයිට් මෘදුකාංගය ලබා ගැනීමට මෙතන ක්ලික් කරන්න.

ඔබට හැකිනම් මෙම ලිපිය ඔබේ මතය අනුව වර්ගීකරණය කිරීමෙන් (Rating) මෙම බ්ලොග් අඩවියේ දියුණුවට සහය වන්න. ඔබේ ප්‍රතිචාර සඳහා සැම විටම විවෘතයි.

ආර්.එස්.එස්. ඔස්සේ සම්බන්ධ වීමට මෙතන ක්ලික් කරන්න

ගෝස්ට්! අන්තර්ජාලයේ ඔබට අතථ්‍ය පරිඝණකයක් (Virtual Computer)

ඔන්න ඕනෑම කෙනෙකුට දැන් අන්තර්ජාලය හරහා තමන්ගේම අතථ්‍ය පරිඝණකයක (Virtual Computer) අත්දැකීම විඳ ගත හැකියි. මෙම සේවාව හඳුන්වන්නේ ගෝස්ට් (G.ho.st – Global Hosted Operating System) හෙවත් ගෝලීය සංග්‍රාහක මෙහෙයුම් පද්ධතිය ලෙසයි.

Ghost-Desktop-Small
ගෝස්ට් මෙහෙයුම් පද්ධතියේ ඩෙස්ක්ටොපය (මවිසින් වෝල්පේපරය වෙනස් කළ පසු), විශාල කිරීමට ඡායාරූපයේ ක්ලික් කරන්න

මෙමගින් ඔබට ගිගා බයිට් 15ක දත්ත ගබඩා කර හැකි ලොව ඕනෑම තැනක සිට සම්බන්ධ විය හැකි අන්තර්ජාල පරිඝණකයක සේවාව ලබා ගන්න පුළුවන්. මෙහිදී භාවිතා වන්නේ අන්තර්ජාලය මත පදනම් වූ මෙහෙයුම් පද්ධතියක් වන අතර ඒ හරහා ඔබේ මූලික පරිඝණක අවශ්‍යතාවයන් සඳහා සැකසුන වැඩසටහන් සහ සේවාවන් කිහිපයකින් ගෝස්ට් සමන්විතයි.

සරල පාලන පැනලයක් හරහා ගෝස්ට් මෙහෙයුම් පද්ධතිය ඔබට අවැසි ආකාරයට සකසා ගත හැක. තවද ට්විටර්, ‍ෆ්ලිකර් වැනි සමාජ ජාලා (Social Networks) සඳහා අන්තර්ගත (in-built) වැඩසටහන් වලින් සමන්විත ගෝස්ට් බහුමාධ්‍ය (multimedia) සඳහා ද සහය දක්වයි. මයික්‍රොසොෆට් වර්ඩ් ගොනු විවෘත කළ හැකි සෝහෝ රයිටර් නම් පාඨ සංස්කාරක වැඩසටහනකින් ද මයික්‍රොසොෆට් එක්සෙල් සඳහා සෝහෝ ශීට්ස් නම් පැතුරුම් පත් වැඩසටහනකින් ද ගෝස්ට් සපිරි ය. ගූග්ල් සහ යාහූ වැනි අන්තර්ජාල සේවාවන් රැසක් ද ගෝස්ට්හි ඇතුලත්ය.

Ghost-Control-Panel-Small
ගෝස්ට් මෙහෙයුම් පද්ධතියේ පාලන පැනලය, විශාල කිරීමට ඡායාරූපයේ ක්ලික් කරන්න

Ghost-Zoho-Writer-Small
සෝහෝ රයිටර් සමග පෙළ සංස්කරණය, විශාල කිරීමට ඡායාරූපයේ ක්ලික් කරන්න

Ghost-Zoho-Sheets-Small
සෝහෝ ශීට්ස් සමග ප්‍රස්ථාර, විශාල කිරීමට ඡායාරූපයේ ක්ලික් කරන්න

ගෝස්ට් වෙබ් අඩවියේ සඳහන් වන පරිදි මෙම අන්තර්ජාල මෙහෙයුම් පද්ධතිය තවමත් පවතින්නේ බීටා නිකුතුවේය. ගෝස්ට් නොමිලේ ලැබෙන සේවාවක් වන අතර ඉතා කෙටි සහ සරල ලියාපදිංචි වීමකින් අනතුරුව භාවිතා කළ හැක.

මා ද ගෝස්ට් අත්හදා බැලීම ඇරඹුවා පමණි, නමුත් අනාගතයේ දී ඉතාමත් ප්‍රයෝජනවත් සේවාවක් බවට පත් වීමට බොහෝ ඉඩ ඇත. තවද ගූග්ල් ක්‍රෝම් මෙහෙයුම් පද්ධතිය පිළිබඳ යම් අවබෝධයක් ලබා ගැනීමට ද ගෝස්ට් උපකාරී වන බව මගේ හැඟීමයි. ඔබත් ඉඩ ලද ‍විටෙක භාවිතා කර අදහස් දක්වන මෙන් මා ඉල්ලා සිටිනවා.

ගෝස්ට් වෙබ් අඩවියට පිවිසීමට මෙතන ක්ලික් කරන්න

ඔබට හැකිනම් මෙම ලිපිය ඔබේ මතය අනුව වර්ගීකරණය කිරීමෙන් (Rating) මෙම බ්ලොග් අඩවියේ දියුණුවට සහය වන්න. ඔබේ ප්‍රතිචාර සඳහා සැම විටම විවෘතයි.

ආර්.එස්.එස්. ඔස්සේ සම්බන්ධ වීමට මෙතන ක්ලික් කරන්න

ලොව අමතක කළ ශ්‍රේෂ්ඨයෝ – නිකොලා ටෙස්ලා – ලොවම එළිය කළ මිනිසා

නිකොලා ටෙස්ලා යන නාමය මට මුලින්ම හමු වූයේ “ද ප්‍රෙස්ටීජ්” (The Prestige (2006)) චිත්‍රපටයේ එක්තරා චරිතයක් ලෙසයි. එම චරිතය සැබෑ පුද්ගලයකු මත පදනම් වූවක් බව මා කිසි විටෙකත් සිතුවේ නැත. නමුත් පසු ගිය දහවන දා (ජූලි 10ය) මා නෙත ගැටුන ලිපියක් නිසා නිකොලා ටෙස්ලා යනු අප කිසි ලෙසකින්වත් අමතක නොකළ යුතු ශ්‍රේෂ්ඨ පුද්ගලයකුයැයි මට සිතුනා. සරලව කියතොත් අද ඔබේ නිවසට විදුලි බලය ලැබී ඇත්තේ මෙම අපූරු විද්‍යාඥයා නිසා. මෙම ලිපිය පදනම් වන්නේ ඔහු ගැන මා අන්තර්ජාලයෙන් සොයා ගත් වැදගත් මෙන්ම සිත් ගන්නා තොරතුරු කිහිපයක් මතය.

Nikola-Tesla

මොහුගේ විශිෂ්ඨතම මෙන්ම වඩාත් ප්‍රයෝජනවත්ම සොයා ගැනීම වන්නේ විදුලිය බෙදා හැරීම සඳහා ප්‍රත්‍යාවර්තක ධාරා (Alternating current) යොදා ගැනීම වඩාත් සාර්ථක බව ලොවට එළි කිරීමයි. මේ වන විට භාවිතා වූයේ තෝමස් අල්වා එඩිසන් හඳුන්වා දුන් සරල ධාරා (Direct current) මූලික කොට ගත් විදුලිය බෙදා හැරීම ක්‍රම‍යකි. ටෙස්ලා ප්‍රත්‍යාවර්තක ධාරා යොදාගනිමන් එඩිසන්ගේ යාන්ත්‍රණයේ තිබූ අඩු ඵලදායීතාවයට පිළිතුරක් ලබා දුන්නේය. මෙය ප්‍රත්‍යාවර්තක ධාරා සහ සරල ධාරා අතර සටනක් දක්වා වර්ධනය වූ අතර අවසානයේ ටෙස්ලා ජයගත්තේ අද අපට විදුලි බලය ‍ලැබෙන තාක්ශණයේ මුල් පියවර තබමිනි.

1856යේ ජූලි 10වන දා ක්‍රොයේෂියාවේ දී උපත ලද නිකොලා ටෙස්ලා වසර 1884 දී ඇමරිකා එක්සත් ජනපදයට සංක්‍රමණය වූයේය. ඔහුගේ අනෙකුත් සොයා ගැනීම් අතර නූතන විදුලි මෝටරය, රැහැන් රහිත සන්නිවේදනය සහ සම්ප්‍රේෂණය, මූලික ලේසර් තාක්ශණය, ප්‍රතිදීප්ත විදුලි පහන් (fluorescent bulbs), දුරස්ත පාලක සහ ජල විදුලිජනක යන්ත්‍ර මුල් තැන ගනී.

Nikola-Tesla-Home

මෙවන් විශිෂ්ඨ දෑ රැසක් ලොවට තිළිණ කළ මේ අපූරු මිනිසා 1943 ජනවාරි මස 7වන දා ඔහු වසර 10ක් පුරා රැඳී සිටි හොටෙල් නිව් යෝකර් හි 3327 දරණ කාමරයේදී ලොවෙන් සමු ගන්නේ ලොව අද භාවිතා කරන බොහෝ දෑ ලොවට ඉතිරි කරමින්. නමුත් අද ඔහු ලොවටම අමතක වී ඇත්දැයි ඔහු පිළිබඳ ලිපි කියවන විට මා හට සිතුණි. ඔහු ගැන වැඩි විස්තර සඳහා පහත වීඩියෝව නරඹන්න.

ඔබට හැකිනම් මෙම ලිපිය ඔබේ මතය අනුව වර්ගීකරණය කිරීමෙන් (Rating) මෙම බ්ලොග් අඩවියේ දියුණුවට සහය වන්න. ඔබේ ප්‍රතිචාර සඳහා සැම විටම විවෘතයි.

ආර්.එස්.එස්. ඔස්සේ සම්බන්ධ වීමට මෙතන ක්ලික් කරන්න

ගූග්ල් වෙතින් නව මෙහෙයුම් පද්ධතියක්

ගූග්ල් ක්‍රෝම් යන නම දුටු විට ඔබේ සිතට නැගෙන්නේ මොනවාද? වෙබ් බ්‍රව්සරයක් කියා ඔබ පිළිතුරු දේවි. නමුත් 2010 දී ගූග්ල් ක්‍රෝම් පිළිබඳ විමසූවොත් ඔබේ පිළිතුර මෙහෙයුම් පද්ධතියක් නැතහොත් OS එකක් කියා ප්‍රකාශ වනු ඇත. ඒ ගූග්ල් සමාගම විසින් හඳුන්වා දීමට නියමිත ගූග්ල් ක්‍රෝම් මෙහෙයුම් පද්ධතිය නිසායි.

Google-Chrome-OS

ගූග්ල් ක්‍රෝම් මෙහෙයුම් පද්ධතිය ගූග්ල් සමාගමේ තවත් විප්ලවීය ඉදිරිපත් කිරීමක්. මෙම මෙහෙයුම් පද්ධතිය පිළිබඳ ඔවුන් මුලින්ම ප්‍රකාශයට පත් කරේ පසුගිය අඟහරුවාදා. අන්තර්ජාලය වැඩි පුර භාවිතා කරන්නන් වෙනුවෙන් නිමවෙන ගූග්ල් ක්‍රෝම් මෙහෙයුම් පද්ධතිය නෙට්බුක් (Netbook) පරිඝණක මෙන්ම ඩෙස්ක් ටොප් පරිඝණක සඳහා ද සුදුසු බවයි පැවසෙන්නේ.

ලිනක්ස් පදනම් කරගෙන නිර්මාණය වන ක්‍රෝම් මෙහෙයුම් පද්ධතියේ මූලික ගුණාංග වනුයේ වේගය, ආරක්ෂාව සහ සරල බවයි. පරිඝණකය පණ ගන්වා තත්පර ගණනකින් අන්තර්ජාලය හා සම්බන්ධ විය හැකි ලෙස නිපදවෙන ගූග්ල් ක්‍රෝම් මෙහෙයුම් පද්ධතියේ බොහෝ වැඩසටහන් සහ සේවා අන්තර්ජාලය පදනම් කරගෙන ක්‍රියාත්මක වන බව ගූග්ල් ආයතනය පවසනවා.

ගූග්ල් ක්‍රෝම් මෙහෙයුම් පද්ධතිය පිළිබඳ සීමිත තොරතුරු ප්‍රමාණයක් එළි දැක්වූවත් මෙය ද ගූග්ල් වෙතින් නොමිලේ ලැබෙන සේවා අතරට එක් වන බවට ගූග්ල් ක්‍රෝම් බ්ලොග් අඩවියේ සඳහන් වනවා.

වැඩිදුර තොරතුරු සඳහා පහත සබැඳුම් වෙත පිවිසෙන්න

ගූග්ල් ක්‍රෝම් මෙහෙයුම් පද්ධතිය පිළිබඳ නිල දැනුම් දීම
ගූග්ල් ක්‍රෝම් මෙහෙයුම් පද්ධතිය පිළිබඳ නිතර නැගෙන විමසීම් (FAQs)

ඔබට හැකිනම් මෙම ලිපිය ඔබේ මතය අනුව වර්ගීකරණය කිරීමෙන් (Rating) මෙම බ්ලොග් අඩවියේ දියුණුවට සහය වන්න. ඔබේ ප්‍රතිචාර සඳහා සැම විටම විවෘතයි.

ආර්.එස්.එස්. ඔස්සේ සම්බන්ධ වීමට මෙතන ක්ලික් කරන්න

ජීමේල් බීටා වලින් ඔබ්බට

ගූග්ල් සමාගම විසින් ඔවුන්ගේ ප්‍රධාන සේවාවන් කිහිපයක්ම බීටා තත්වයෙන් ඔබ්බට රැගෙනයාමට වේගවත්ව කටයුතු කරමින් තිබෙනවා. පසුගිය අඟහරුවාදා සිට ජීමේල් (Gmail), ගූග්ල් දින දසුන (Google Calendar) සහ ගූග්ල් ලිපි (Google Docs) යන අන්තර්ජාල වැඩසටහන් වල ලාංඡන වල බීටා වචනය භාවිතය ගූග්ල් සමාගම විසින් නතර කොට තිබෙනවා.

Gmail-Out-of-Beta

විශේෂයෙන්ම වසර 2004 අප්‍රේල් පළවන දා ඇරඹි ජීමේල් (Gmail) සේවාව අවුරුදු පහකට වඩා අධික කාලයක් බීටා අවදියේ පසු වුනා. මේ වන විට මිලියන 100 කට අධික පිරිසක් ජීමේල් භාවිතා කරන බව පැවසෙනවා.

මෙම වැඩසටහන් දිගු කාලයක් බීටා අවදියේ පසු වීමට හේතුව ලෙස ගූග්ල් සමාගම දක්වන්නේ වැඩසටහන් වලට නව විශේෂාංග එක් කිරීමට ඔවුන් ගන්නා නිරන්තර උත්සාහය බවයි. නමුත් මෙම වැඩසටහන් බීටා තත්වයෙන් ඔබ්බට රැගෙනයාම සිදු කරන්නේ කවර මිනුම් දණ්ඩකට අනුවදැයි ඔවුන් ප්‍රකාශ කොට නැත.

බීටා තත්වයෙන් මිදුනත් මෙම වැඩසටහන් දියුණුකිරීමට සෑම විටම පියවර ගන්නා බවට ගූග්ල් සමාගම සහතික වෙයි.

ඔබට හැකිනම් මෙම ලිපිය ඔබේ මතය අනුව වර්ගීකරණය කිරීමෙන් (Rating) මෙම බ්ලොග් අඩවියේ දියුණුවට සහය වන්න. ඔබේ ප්‍රතිචාර සඳහා සැම විටම විවෘතයි.

ආර්.එස්.එස්. ඔස්සේ සම්බන්ධ වීමට මෙතන ක්ලික් කරන්න