ඩ්‍රොප්බොක්ස් (Dropbox) ඔබේ දත්ත සඳහා නොමිලේ සබැඳි රක්ෂිතයක් (free online backup)

අපි හැමෝටම තිබෙන ගැටළුවක් තමයි පරිඝණකයේ ගබඩා කර ඇති වැදගත් තොරතුරු සුරක්ෂිතව තබා ගැනීම. මේ ගැන මගේත් අවධානය යොමු වුනේ පසුගිය දවසක මගේ මිතුරෙකුට වුන ඇබැද්දියක් නිසා. පරිඝණකයේ  මෙහෙයුම් පද්ධතිය හදිසියේම ක්‍රියා විරහිතවීම නිසා එහි ගබඩා කර තිබූ දත්ත නැවත ලබා ගැනීම ප්‍රබල ගැටළුක් බවට පත්වුනා. සැලකිය යුතු දත්ත ප්‍රමාණයක් ප්‍රතිසාධනය (recover) කර ගත්තත් සාර්ථක දත්ත රක්ෂිතයක අවශ්‍යතාවය දැනුනේ එදා.

පරිඝණකයේ දෝෂ, මෙහෙයුම් පද්ධතියේ  දෝෂ සහ අනිෂ්ට මෘදුකාංග (malware) වැනි විවිධ හේතු නිසා එසේ අප ගබඩා කර ඇති වැදගත් තොරතුරුවලට හානි සිදුවිය හැක. දත්ත රක්ෂිතය සඳහා සංයුක්ත තැටි, ඩිජිටල් විඩියෝ තැටි, USB ෆ්ලෑෂ් ධාවකයන්, බාහිර දෘඩ තැටි වැනි විවිධ ක්‍රම භාවිතා කරන්න පුළුවන්. නමුත් මේ කිසිම ක්‍රමයක් සම්පූර්ණයෙන්ම සාර්ථක නැහැ. ‍විවිධ හේතු නිසා මෙම මාධ්‍ය වල ද දෝෂ ඇතිවෙන්න ඉඩ තිබෙනවා.

ඉතින් මේ සඳහා ඇති සාර්ථකම විසඳුම තමා සබැඳි රක්ෂිතයක(online backup) පිහිට ලබා ගැනීම. අපට නොමිලේ ලැබෙන් එවන් සේවාවක් තමා ඩ්‍රොප්බොක්ස්(Dropbox). ඩ්‍රොප්බොක්ස් වෙතින් අපගේ දත්ත ගබඩා කිරීමට ගිගාබයිට් දෙකක අවකාශයක් නොමිලේ ලැබෙනවා.

Dropbox

ඩ්‍රොප්බොක්ස්හි ක්‍රියාකාරීත්වය සරලයි, ඩ්‍රොප්බොක්ස් මෘදුකාංගය ස්ථාපනය කර ගත් පසු My Dropbox නම් ෆෝල්ඩරයක් ඔබේ පරිඝණකයේ ස්ථාපනය වනවා. ඔබ කළ යුත්තේ ඔබට රක්ෂිත කිරීමට අවැසි ගොනු (files) මෙම ෆෝල්ඩරයට පිටපත් (copy) කිරීම පමණයි. එම ගොනු ඩ්‍රොප්බොක්ස් අඩවිය සමග ස්වයං-සමමුහුර්ත (Auto Synchronization) වීමකට ලක් වෙනවා. මෙසේ ගබඩා වන දත්ත වෙත ලොව ඕනෑම තැනක සිට අන්තර්ජාලය හරහා ප්‍රවේශ වීමේ හැකියාව ද ලැබෙනවා. ඩ්‍රොප්බොක්ස් මෘදුකාංගය වින්ඩෝස්, ඇපල් මැක් සහ ලිනක්ස් මෙහෙයුම් පද්ධති සඳහා නොමිලේ ලබා ගත හැකියි.

තවද ඔබේ මිතුරන්ට ඩ්‍රොප්බොක්ස් වෙත යවන ආරාධනාවක් ඔබේ මිතුරෙකු පිළිගතහොත් ඔබට තවත් අමතර මෙගා බයිට් 250ක අවකාශයක් වෙන් වෙනවා (මෙසේ ගිගාබයිට් 3ක් දක්වා අමතර අවකාශයක් ලබා ගැනීමට පුළුවන්).

ඩ්‍රොප්බොක්ස් මගින් අපේ දත්ත ගබඩා කිරීමට ලැබෙන ඉඩ සීමා සහිත වුවත් එය අපගේ වැදගත් තොරතුරු රැක ගැනීමට සාර්ථක පිළියමක්යැයි මා සිතනවා. තවද ඔබට අවැසි නම් මුදල් ගෙවා ලැබෙන ඉඩ ප්‍රමාණය ගිගාබයිට් 50ක් හෝ 100ක් දක්වා වැඩි කර ගත හැකියි.

ඩ්‍රොප්බොක්ස් අඩවියට ප්‍රවේශ වීමට පහත සබැඳිය භාවිතා කරන්න

http://www.getdropbox.com/

ඔබට හැකිනම් මෙම ලිපිය ඔබේ මතය අනුව වර්ගීකරණය කිරීමෙන් (Rating) මෙම බ්ලොග් අඩවියේ දියුණුවට සහය වන්න. ඔබේ ප්‍රතිචාර සඳහා සැම විටම විවෘතයි.

ආර්.එස්.එස්. ඔස්සේ සම්බන්ධ වීමට මෙතන ක්ලික් කරන්න

ආසන පටියට(seat belt) වසර 50යි

මගීන්ගේ ආරක්ෂාව සඳහා දැනට වාහනවල භාවිතා කරන ස්ථාන තුනකින් සබැඳි ආසන පටිය(three point seat belt) නිල වශයෙන් හඳුන්වා දී අදට (අගෝස්තු 13වන දා) වසරක් සපිරෙනවා.

50-years-seat-belt

වර්ෂ 1959යේ  අගෝස්තු 13වන දා ලොව ප්‍රථම ස්ථාන තුනකින් සබැඳි ආසන පටි සහිත වොල්වෝ PV544 මාදිලියේ මෝටර් රථයක් ස්වීඩනයේ අලෙවි නියෝජිතයකු වෙත ප්‍රවාහනය කරනු ලැබුවා. එතැන් පටන් සරල නමුත් ආරක්ෂාකාරී මෙම නිපැයුම ලොව මිලියන ගණනකගේ දිවි බේරා දීමට සමත් වුණා.

මෙම නිර්මාණයේ ගෞරවය හිමිවන්නේ එවකට වොල්වෝ සමාගමේ ඉංජිනේරුවකු වූ නිල්ස් බොලින් (Nils Bohlin) මහතාටයි. ඔහුගේ මෙම නිපැයුම අදත් මගී ආරක්ෂාවේ වැදගත් කොටසක්. මෙම නිපැයුමට පෙර උකුල් පටියක්(lap belt) මගීන්ගේ ආරක්ෂාවට භාවිතා කළ අතර ඉන් අනතුරක දී මගියා ආසනයේ රඳවා තැබීමට සමත් වුවත් හිස ඉදිරි පස ගැටීම වැළැක්වීම අසීරු විය.

nils-bohlin
නිල්ස් බොලින් මහතා තම නිපැයුම සමඟ

බොහෝ රටවල ආසන පටි භාවිතය අත්‍යාවශ්‍ය වන අතර ශ්‍රී ලංකාවේ ද මේ සම්බන්ධව නීත පනවන බවට රාවයක් පැතිර  ගියත් ලංකාවේ ආසන පටි භාවිතය පවතින්නේ නම් අවම මට්ටමකයි.

මේ ගැන වැඩි විස්තර සඳහා පහත වීඩියෝව නරඹන්න.


ඔබට හැකිනම් මෙම ලිපිය ඔබේ මතය අනුව වර්ගීකරණය කිරීමෙන් (Rating) මෙම බ්ලොග් අඩවියේ දියුණුවට සහය වන්න. ඔබේ ප්‍රතිචාර සඳහා සැම විටම විවෘතයි.

ආර්.එස්.එස්. ඔස්සේ සම්බන්ධ වීමට මෙතන ක්ලික් කරන්න

ෆේස්බුක් වෙතින් ට්විටර් හා සමාන වෙබ් අඩවියක්

ඇත්තේන්ම මේ ප්‍රවෘත්තිය තවමත් සනාථ නොවූවක්. නමුත් දැනුවත් කර තිබීම හොඳයැයි සිතුනා. අද දින බොහෝ ‍තාක්ශණික වෙබ් අඩවි වල සඳහන් වූ අකාරයට ෆේස්බුක් ට්විටර් හා සමාන වෙබ් අඩවියක් දියත් කිරිමට නියමිතයි. මෙම අඩවිය ඔවුන් හඳුන්වා ඇත්තේ ෆේස්බුක් ලයිට් යන නමින්.

ආරංචිවලට අනුව සමහර ෆේස්බුක් සාමාජිකයන්ට දැනටමත් මෙහි බීටා අඩවියට සම්බන්ධ වන්නයැයි ආරධනා ලැබී තිබෙනවා. ට්විටර් අඩවිය ඉතා සීඝ්‍රයෙන් ප්‍රචලිත වන්නක් වන අතර ශ්‍රී ලංකාවේ ද එය යම්කිසි වර්ධනයක් ලබා තිබෙනවා. ට්විටර් ඉතාමත් සරල එමෙන්ම ප්‍රායෝගික සේවාවක් ලෙස සැලකෙන අතර තොරතුරු සහ අදහස් හුවමාරුව සඳහා කදිම පිළිතුරක්.

facebook-lite
ෆේස්බුක් ලයිට් බීටා අඩවියට ආරධනා ලැබූවෙකු විසින් ප්‍රකාශයට පත් කළ තිර සටහනක්

මේ අතර පසු ගිය වසරේ ට්විටර් මිලදී ගැනීමේ අසාරථක උත්සාහයක ද ෆේස්බුක් නියැළුනා. කෙසේ වෙතත් ෆේස්බුක් විසින් මෙම ප්‍රවෘත්තිය සනාථ කොට නැහැ. මේ සම්බන්ධයෙන් ඔවුන්ගේ ප්‍රතිචාර ලැබෙන තුරු අපි බලා සිටිමු.

ඔබට හැකිනම් මෙම ලිපිය ඔබේ මතය අනුව වර්ගීකරණය කිරීමෙන් (Rating) මෙම බ්ලොග් අඩවියේ දියුණුවට සහය වන්න. ඔබේ ප්‍රතිචාර සඳහා සැම විටම විවෘතයි.

ආර්.එස්.එස්. ඔස්සේ සම්බන්ධ වීමට මෙතන ක්ලික් කරන්න

ෆොටෝෂොප් අඩවියෙන් ඔ‍බේ ඡායාරූප සඳහා ගිගාබයිට් 2ක වෙබ් අවකාශයක්

www.photoshop.com අඩවිය ඔස්සේ දැන් ඔ‍බේ ඡායාරූප ගබඩා කිරීම සඳහා නොමිලේ ගිගාබයිට් 2ක වෙබ් අවකාශයක් ලැබෙනවා. මීට අමතරව එම ඡායාරූප සඳහා මූලික සංස්කරණ පහසුකම් ද මෙම අඩවිය ඔස්සේ ලබා දී තිබෙනවා.

PhotoShop-dot-com-Home

අපට සුපුරුදු ඇඩෝබ් සමාගම විසින් අරඹන ලද මෙම අඩවිය ආරම්භයේ දී විවෘත වූයේ ඇමරිකා එක්සත් ජනපදයේ සිට සම්බන්ධ වන්නන්ට පමණයි. නමුත් මේ වන විට නොමිලේ ලබා ගත හැකි ඇඩෝබ් හැඳුනුම් පතක්(Adobe ID) මගින් මේ සියළු පහසුකම් දැන් අපට ලබා ගන්නට පුළුවන් (මෙසේ අනෙක් රටවල් සඳහා www.photoshop.com අඩවිය විවෘත වූ දිනය සොයා ගැනීමට නම් හැකි වුනේ නැහැ).

PhotoShop-dot-com-Editing

මූලික සංස්කරණ පහසුකම් මෙන්ම ඡායාරූප සඳහා එක් කළ හැකි විවිධ හැඩතල සහිත ඡායාරූප සරසනයකින්(photo decorator) ද මෙම අඩවිය සමන්විතයි. තවද මෙම අඩවියට එක් කරන ඡායාරූප ඔබට අවැසි පරිදි සංවිධානය කිරීමට ද ඔබට හැකියාව ලැබෙනවා.

PhotoShop-dot-com-Album-001

PhotoShop-dot-com-Album-002

ෆෙස්බුක්, ෆ්ලිකර්, ෆොටෝබකට් සහ පිකාසෝ වැනි සේවාවන්වල ඔබ ගබඩා කර ඇති ඡායාරූප කෙළින්ම මෙම අඩවියට ආනයනය කිරීමට හැකිවීමත් මෙහි ඇති විශේෂත්වයක්.

ඔබ එක් කරන ඡායාරූප ඒ ආකාරයෙන්ම (තත්ව හානියකින් තොරව) මෙම අඩවියේ ගබඩා කරන බව ඇඩෝබ් සමාගම පවසනවා. එම ඡායාරූපවලට ඔබට පමණක් ප්‍රවේශ විය හැකි ලෙස සීමාවන් පැණවිය හැකි අතරම අවැසිනම් අන් අය සඳහා ද විවෘත කළ හැකිය.

ඔබත් නිතර ඡායාරූප සමග ගණුදෙනු කරන්නෙක් නම් මෙම අවවිය ඔබට කදිම උපකාරයක් වේවි.

නොමිලේ ඇඩෝබ් හැඳුනුම් පතක් ලබා ගැනීමට පහත සඳහන් වෙබ් අඩවිය භාවිතා කරන්න.

https://www.adobe.com/cfusion/membership/index.cfm?nf=1#

මාගේ පෞද්ගලික photoshop.com ගැලරිය නැරඹීමට පහත සබැඳුම භාවිතා කරන්න.

http://milindav.photoshop.com/

ඔබට හැකිනම් මෙම ලිපිය ඔබේ මතය අනුව වර්ගීකරණය කිරීමෙන් (Rating) මෙම බ්ලොග් අඩවියේ දියුණුවට සහය වන්න. ඔබේ ප්‍රතිචාර සඳහා සැම විටම විවෘතයි.

ආර්.එස්.එස්. ඔස්සේ සම්බන්ධ වීමට මෙතන ක්ලික් කරන්න

ට්විටර්, ෆේස්බුක් අක්‍රිය වීම සහ ජෝර්ජියාව

රුක්ෂාන්ගේ බ්ලොග් සටහනේ කලින් සඳහන් වූ පරිදි ට්විටර්, ෆේස්බුක් මෙන්ම සමහර ගූග්ල් සේවාවන් කිහිපයක් ද අගෝස්තු 6 වන දා අඩපණ වූවා. ට්විටර් අඩවිය මේ වන තුරුත් සම්පූර්ණයෙන් යතා තත්වයට පත්ව නැහැ. මීට හේතුව ලෙස දක්වා තිබුනේ බෙදාහරින ලද – සේවා ප්‍රතික්ෂේප කිරීමේ පහර දීමක් (Distributed Denial-of-service (DDoS) attack) ලෙසයි.

බෙදාහරින ලද – සේවා ප්‍රතික්ෂේප කිරීම (DDoS)
මෙහිදී සිදු වන්නේ ආරක්ෂිත දෝෂ සහිත පරිඝණකයක ස්ථාපනය වූ අනිෂ්ට මෘදුකාංගයක් (malware) උපයෝගී කරගෙන ඉලක්ක කර ගත් නිශ්චිත වෙබ් අඩවි සමග නිරන්තර සබඳතාවයන් ඇති කිරීමයි. මෙසේ ඉලක්ක කර ගත් වෙබ් අඩවිවලට ලැබෙන අසීමිත සබඳතා ඉල්ලුම් නිසා එම අඩවි අක්‍රිය වී සමාන්‍ය භාවිතා කරන්නන්ට එම අඩවි සමග සබඳතා ඇතිකරගැනීම අපහසු වෙනවා. මෙවැනි පහර දීමක් සඳහා අනිෂ්ට මෘදුකාංග හරහා සම්බන්ධ කරන ලද පරිඝණක දහස් ගනණින් යුත් ජාලයක්(botnet) යොදා ගනු ලබනවා. මෙවැනි ජාලයක් ගොව නැංවීම සඳහා අයාචිත තැපෑල(spam) මගින් බෙදා හරින ලද අනිෂ්ට මෘදුකාංග බොහෝ දුරට උපකාරී වනවා.

botnet

ජෝර්ජියාව?
නවතම ප්‍රවෘත්ති වලට අනුව මෙම පහරදීමේ මූලික අරමුණ මෙම වෙබ් අඩවි අක්‍රිය කිරීම නොව ජෝර්ජියානු බ්ලොග්කරුවෙකු නිහඬ කිරීම පිණිස ඔහුගේ මෙම සේවාවන් වල ගිණුම් හා සම්බන්ධ වීම වැලැක්වීම මූලික කොටගෙන සිදුවූ බවයි. මෙම බ්ලොග්කරුවා ඔහුගේ බ්ලොග් අඩවියේ සඳහන් කර ඇත්තේ මෙය ඔහු සහ ජෝර්ජියාව ඉලක්ක කරගත් දෙයක් බවයි.

georgian-blogger
ජෝර්ජියානු බ්ලොග්කරුවාගේ බ්ලොග් අඩවිය

ඔබත් හවුල් ද?
බය වෙන්න එපා, නමුත් ඔබේ පරිඝණකයේ ආරක්ෂක වැඩසටහන්(security software) යාවත් කාලීන කර නැත්නම් නොදැනීම ඔබේ පරිඝණකයත් මෙවන් ජාලයක හවුල් කාරයෙක් වන්නට පුළුවන්. එම නිසා ඔබේ පරිඝණකයේ ආරක්ෂක වැඩසටහන් යාවත් කාලීන කිරීම ඉතා වැදගත් වන අතර ඔබට නුහුරු ‍වෙබ් අඩවි කරා රැගෙන යන විද්‍යුත් තැපල් සබැඳුම් වල ක්ලික් කිරීමෙන් වලකින්න.

ඔබට හැකිනම් මෙම ලිපිය ඔබේ මතය අනුව වර්ගීකරණය කිරීමෙන් (Rating) මෙම බ්ලොග් අඩවියේ දියුණුවට සහය වන්න. ඔබේ ප්‍රතිචාර සඳහා සැම විටම විවෘතයි.

ආර්.එස්.එස්. ඔස්සේ සම්බන්ධ වීමට මෙතන ක්ලික් කරන්න

ඔ‍බේ ජීමේල් ගිණුම රැකගන්න

පසු ගිය දිනෙක ට්විටර්හි වටිනා තොරතුරු රැසක් අපහාරකයකු (Hacker) විසින් සොරා ගෙන තිබෙනවා. ඒ ට්විටර් සේවකයකුගේ ජීමේල් ගිණුම තමා සතු කර ගනිමින්, ඒ හරහා ට්විටර් සේවාවට අයත් ගූගුල් ලිපි වැනි නොයෙකුත් සේවාවන්හි ගබඩා කර තිබූ තොරතුරු හා සම්බන්ධ වෙමින්. මෙම අපහාරණය (Hacking) සිදු කොට ඇත්තේ එම සේවකායාගේ ජීමේල් ගිණුමේ මුරපදය නැවත ලබා ගැනීමේ (Password recovery) සේවාව භාවිතා කරමින්. මෙම ජීමේල් ගිණුමේ නැවත ලබා ගත් මුරපදය ලැබෙන්නට සලස්වා ඇත්තේ නිෂ්ක්‍රීය (Deactivated) වූ හොට්මේල් ගිණුමකටයි. මෙම හොට්මේල් ගිණුමේ තොරතුරු සොයාගත් මෙම අපහාරකයා එය නැවත සක්‍රිය කර ජීමේල් ගිණුමේ සම්පූර්ණ පාලනය තමා සතු කර ගෙන තිබෙනවා.

Gmail-security

අපහාරණය සියයට සියයක් නැවැත්විය නොහැකි වුවත් අප වඩාත් ආරක්ෂාකාරී විය යුතු වනවා. පහත දැක්වෙන්නේ ජීමේල් ගිණුමේ ආරක්ෂාව සම්බන්ධයෙන් මා දැනගත් අප හිතට ගතයුතු වැදගත් කරුණු කිහිපයක්.

ශක්තිමත් මුරපදයක් භාවිතා කිරීම (Strong Password)
මෙය නැවතත් මතක් කිරීම සුදුසුයයි සිතුණා, ජීමේල් මුරපදය පමණක් නොව අන් කවර මුරපදයකට වුව මෙය වලංගුයි. ශක්තිමත් මුරපදයකට පදනම වන්නේ එදිනෙදා සාමාන්‍යයන් නිතර භාවිතා වන වචන යොදා නොගැනීමයි. අවම වශයෙන් අනුලකුණු (characters) 10ක් වත් තිබිය යුතු බවයි මගේ හැඟීම. ත‍වද මුරපදයකට අකුරු, සංඛ්‍යාත ස‍හ සංකේත (letters, numbers and symbols) යන තුන්වර්ගයේම අනුලකුණු ඇතුලත් කිරීම වඩා සුදුසුයි (උදා: jan587my100%).

ජීමේල් ගිණුමේ දෙවන විද්‍යුත් තැපෑල ලිපිනය (Alternate e-mail address) සක්‍රිය සහ ආරක්ෂාකාරී එකක් වීම
ඔබේ ජීමේල් ගිණුමේ දෙවන විද්‍යුත් තැපෑල ලිපිනය සඳහා ලබා දී ඇත ලිපිනය ඉතා වැදගත්, නැවත ලබා ගත් මුරපදය ඔබ විද්‍යුත් තැපෑල හරහා ලබා ගතහොත් එය ලැබෙන්නේ මෙම ලිපිනයටයි. ඒ නිසා ඒ සඳහා ආරක්ෂාකාරී මෙන්ම භාවිතයේ ඇති ලිපිනයක් ලබා දිය යුතු අතර එම ලිපිනය සහිත ගිණුම නිතර පරිහරණය කිරීමටද ඔබ වග බලා ගත යුතුයි.

එස්. එම්. එස්. මගින් මුරපදය නැවත ලබාගැනීම සක්‍රිය කිරීම
මෙම ක්‍රමය ජීමේල් සඳහා මෑතකදී හඳුන්වා දුන්නක්. නමුත් මෙය වඩාත් ආරක්ෂාකාරී ක්‍රමයක් ලෙස සැලකෙනවා. ඒ ඔබේ ජංගම දුරකථනයටම මුරපදය ගෙන්වා ගැනීමට හැකිවීමත් එය අනෙකෙකු භාවිතා කිරීමේ අවස්ථා අඩු වීමත් නිසාය.

ආරක්ෂක ප්‍රශ්ණය (Security Question) හරහා මුරපදය නැවත ලබාගැනීම
එතරම්ම ආරක්ෂාකාරී නොවූවත් නිවැරදි ව භාවිතා කිරීමෙන් යම් ප්‍රතිඵල ලබා ගත හැකි ක්‍රමයක්. මෙහිදී ජීමේල් මගින් ලබා දෙන සාමාන්‍ය ආරක්ෂක ප්‍රශ්ණ වෙනුවට තමාගේම ආරක්ෂක ප්‍රශ්ණයක් සහ පිළිතුරක් ලබා දීමෙන් ද ඔබේ ජීමේල් ගිණුමේ ආරක්ෂාව දියුණු කළ හැක.

Gmail-password

මෙම වෙනස්නම් සිදු කිරීමට ජීමේල්හි Settings පිටුවේ ඇති Accounts & imports ටැබයේ Google Account settings සබැඳුමේ ක්ලික් කරන්න. ඉන් පසු Google Account settings පිටුවේ ඇති Change Password recovery options සබැඳුමේ ක්ලික් කරන්න. ඔබේ ජීමේල් ගිණුම ආරක්ෂා කර ගැනීමට මෙම කරුණු උපකාර වේයයි මා සිතනවා.

ඔබට හැකිනම් මෙම ලිපිය ඔබේ මතය අනුව වර්ගීකරණය කිරීමෙන් (Rating) මෙම බ්ලොග් අඩවියේ දියුණුවට සහය වන්න. ඔබේ ප්‍රතිචාර සඳහා සැම විටම විවෘතයි.

ආර්.එස්.එස්. ඔස්සේ සම්බන්ධ වීමට මෙතන ක්ලික් කරන්න

මයික්‍රොසොෆ්ට් වින්ඩෝස් 7 වැඩ කටයුතු නිමා කෙරේ

බොහෝ දෙනා වින්ඩෝස් 7 ගැන දැඩි උන්නදුවකින් ඉන්නේ. වින්ඩෝස් 7 වැඩ කටයුතු නිම කළ බව මයික්‍රොසොෆ්ට් සමාගම ඊයේ (බදාදා) නිල වශයෙන් ප්‍රකාශ කළා.

Windows-7.Finalized

මේ අනුව කලින් සැළසුම් කළ පරිදි ඔක්තෝම්බර් 22වන දා වින්ඩෝස් 7 නිකුත් කිරීමට මයික්‍රොසොෆ්ට් සමාගමට අවස්ථාව ලැබෙනවා. ඇත්ත වශයෙන්ම වින්ඩෝස් 7හි වැඩ සම්පූර්ණ කර ඇත්තේ ජූලි 13වන දා, නමුත් වැඩිපුර දින 10ක් යොදා ගෙන එය තව දුරටත් පරීක්ෂාවට ලක් කළ බවයි මයික්‍රොසොෆ්ට් සමාගම පවසන්නේ.

පහත දැක්වෙන්නේ මේ සම්බන්ධයෙන් මයික්‍රොසොෆ්ට් සමාගම නිකුත් කළ වීඩියෝවක්.

ඔබට හැකිනම් මෙම ලිපිය ඔබේ මතය අනුව වර්ගීකරණය කිරීමෙන් (Rating) මෙම බ්ලොග් අඩවියේ දියුණුවට සහය වන්න. ඔබේ ප්‍රතිචාර සඳහා සැම විටම විවෘතයි.

ආර්.එස්.එස්. ඔස්සේ සම්බන්ධ වීමට මෙතන ක්ලික් කරන්න

සැප්තැම්බර් 30ස් වෙනිදාට ගූගුල් වේව් ගිණුම් 100,000 විවෘත කෙරේ

ඔන්න පසුගිය සතියේ අපේ බුධාජීවගේ ලියමනේ සඳහන් වූ පරිදි මමත් ගූගුල් වේව් සඳහා අයැදුම් කරා. ඇත්තටම ඒ ගැන වැඩිපුර සොයා බැලුවේ එම ලිපියෙන් පසුවයි. ගූගුල් වේව් නිසා ඉදිරියේදී විද්‍යුත් සන්නිවේදනය බොහෝ දුරට වෙනස් වීමට ඉඩ තිබෙනවා.

Google-Wave-Screenshot
විශාල කිරීමට ඡායාරූපයේ ක්ලික් කරන්න

දැනට සංවර්ධකයින්(Developers) 6,000 කට පමණක් සීමා කර ඇති ගූගුල් වේව් සැප්තැම්බර් 30වෙනිදා පොදු ගිණුම් 100,000ක් ලබා දෙන බව ගූගුල් වේව් සංවර්ධක බ්ලොග් අඩවියේ සඳහන් වෙනවා. මේ ගිණුම් 100,000ය තෝරා ගන්නේ ගූගුල් වේව් අයැදුම් කල අයගෙන් පමණයි. ගිණුම් 100,000ක් කියන්නෙ ඉතාම සීමිත සංඛ්‍යාවක් කියලයි මට හිතෙන්නෙ.

තවද යෙදුම් ක්‍රමලේඛන අතරුමුහුණත(application programming interface (API)) හරහා ගූගුල් වේව් සන්නිවේදන වර්ඩ්ප්‍රෙස් සමග අන්තර්ගත කීරීමේ වැඩසටහනක් ද නිර්මාණය කර ඇති බව බ්ලොග් අඩවියේ සඳහන් වෙනවා.

සැප්තැම්බර් 30ස් වෙනිදාට බලමු අපටත් ගූගුල් වේව් උණු උණුවේම ලබාගන්න හැකිවෙයි ද කියා.

මෙම සතියේ මත විමසුම ගූගුල් වේව් ගැනයි, ඊට සහභාගී වී සහය දක්වන මෙන් කරුණාවෙන් ඉල්ලා සිටිනවා. ඔබට හැකිනම් මෙම ලිපිය ඔබේ මතය අනුව වර්ගීකරණය කිරීමෙන් (Rating) මෙම බ්ලොග් අඩවියේ දියුණුවට සහය වන්න. ඔබේ ප්‍රතිචාර සඳහා සැම විටම විවෘතයි.

ආර්.එස්.එස්. ඔස්සේ සම්බන්ධ වීමට මෙතන ක්ලික් කරන්න

බිල් ගේට්ස්ගේ ශ්‍රී ලංකා වීඩියෝ පණිවුඩය

මගේ කලින් ලිපියේ බිල් ගේට්ස් ශ්‍රී ලංකාවට වීඩියෝ පණිවුඩයක් එවූ බව සඳනන් වුනා. මෙම වසර ශ්‍රී ලංකාවේ තොරතුරු තාක්ශණය සහ ඉංග්‍රීසි භාෂා‍ව වෙනුවෙන් නම් කිරීම සම්බන්ධවයි මෙම වීඩියෝ පණිවුඩය ලැබුණේ. ඒ වීඩියෝ පණිවුඩයේ යූටියුබ් වීඩියෝවක් මගේ මිතුරෙකු මාර්ගයෙන් මට ලැබුණා. ඔන්න නැරඹුවේ නැති කෙනෙක් ඉන්නවනම් දැන් නරඹන්න පුළුවන්.


ආර්.එස්.එස්. ඔස්සේ සම්බන්ධ වීමට මෙතන ක්ලික් කරන්න

බිල් ගේට්ස් භෞතික විද්‍යා දේශන බෙදා හරියි

බිල් ගේට්ස් නාමය පසු ගිය දින කීපයේ ශ්‍රී ලංකාවේ පුවත් අතර නිතර සඳහන් වුනා. ඒ මයික්‍රොසොෆ්ට් විස්ටා සහ මයික්‍රොසොෆ්ට් ඔ‍ෆිස් සිංහලෙන් නිකුත් වීම නිසා. තවද ඔහු ශ්‍රී ලංකාකියන්ට වීඩියෝ පණිවුඩයක්ද එවූ බව ද වාර්තා වනවා. මේ වන විට මයික්‍රොසොෆ්ට් සමාගමේ පූර්ණ කාලීන සේවයෙන් ඉවත් වී සිටින ගේට්ස් වැඩි අවධානයක් යොමු කොට ඇත්තේ තම පදනමේ කටයුතු වලට බවයි පැවසෙන්නේ. මෙම වැඩ කටයුතු අතරම ලොව සුප්‍රසිද්ධ භෞතික විද්‍යා දේශන මාලාවක් අන්තර්ජාල‍ය ඔස්සේ නිකුත් කිරීමට ඔහු කටයුතු කර තිබෙනවා. 1964දී ලොව පතල විද්‍යාඥයකු සහ නොබෙල් සම්මාන ලාභියෙකු වන රිචර්ඩ් ෆයින්මන් (Richard P. Feynman (1918-1988)) විසින් පවත්වන ලද මෙම දේශන මාලාව මයික්‍රොසොෆ්ට් පර්යේෂණ (Microsoft Research) වෙබ් අඩවිස ඔස්සේ නොමිලේම නැරඹිය හැක. මෙම ව්‍යාපෘතිය නම් කොට ඇත්තේ ටූවා නමිනි (Project Tuva).

Project-Tuva

ෆයින්මන්ගේ උගැන්වුම් රටාව ජනතාව වැඩි වශයෙන් විද්‍යාව කෙරෙහි නැඹුරුවීමට පෙළඹන්නක් බවත් මීට ව‍සර 20කට පෙර තමා මුල් වරට නැරඹූ එම දේශන මාලාව ලොවට ඉදිරිපත් කිරීම තමාගේ සිහිනයක් වූ බවත් ගේට්ස් පවසනවා.

ගුරුත්වාකර්ශණය වැනි භෞතික විද්‍යා සිද්ධාන්ත වලින් අන්තර්ගත මෙම දේශන මාලාව නැරඹීමටනම් ඔබ මයික්‍රොසොෆ්ට් සිල්වර්ලයිට් (Microsoft Silverlight) මෘදුකාංගය ඔබේ පරිඝණකයේ ස්ථාපනය කළ යුතු වෙනවා.

මෙම දේශන මාලාව නැරඹීමට මෙතන ක්ලික් කරන්න.

මයික්‍රොසොෆ්ට් සිල්වර්ලයිට් මෘදුකාංගය ලබා ගැනීමට මෙතන ක්ලික් කරන්න.

ඔබට හැකිනම් මෙම ලිපිය ඔබේ මතය අනුව වර්ගීකරණය කිරීමෙන් (Rating) මෙම බ්ලොග් අඩවියේ දියුණුවට සහය වන්න. ඔබේ ප්‍රතිචාර සඳහා සැම විටම විවෘතයි.

ආර්.එස්.එස්. ඔස්සේ සම්බන්ධ වීමට මෙතන ක්ලික් කරන්න